មណ្ឌលគីរី៖ ក្រុមការងារគណៈកម្មការបោះឆ្នោតឃុំក្រង់តេះ ក្នុងខេត្តមណ្ឌលគីរីបានដឹកជញ្ចូនហិបឆ្នោត ដោយប្រើសត្វដំរី ដើម្បីឆ្លងកាត់អូរប្លាយ ទៅកាន់ការិយាល័យនៅភូមិឡៅរមៀត ខេត្តមណ្ឌលគិរី។
ប្រធានគណៈកម្មការរៀបចំការបោះឆ្នោតខេត្តមណ្ឌលគិរី លោក គិន ជាន នៅថ្ងៃទី២២ ខែកក្កដា ឆ្នាំ២០២៣ បានបង្ហោះរូបភាព និងឃ្លីបវីដេអូប្រើសត្វដំរីដើម្បីដឹកជញ្ចូនហិបឆ្នោត និងសម្ភារបរិក្ខា ដោយឆ្លងកាត់អូរប្លាយ ផ្លូវលំបាកភក់ជ្រាំ និងឆ្លងកាត់ព្រៃ ធ្វើដំណើរទៅកាន់ការិយាល័យលេខ ០០៨៣ នៅភូមិឡៅរមៀត ក្នុងឃុំក្រង់តេះ។
លោកបានអរគុណ និងកោតសរសើរដល់ក្រុមការងារដែលស្វះស្វែងក្នុងការដឹកជញ្ជូនទាំងភ្លៀងធ្លាក់ និងឆ្លងកាត់ឧបសគ្គផ្លូវលំបាកដោយថា៖ «ទោះលំបាកប៉ុណ្ណា ក៏ត្រូវតែស៊ូរដែរគ្នាយើង។ ជូនពរសំណាងល្អគ្រប់គ្នា។ អរគុណច្រើនសម្រាប់ការលះបង់មួយនេះ»។
លោក គិន ជាន ក៏បានឱ្យបង្ហាញរូបភាពក្រុមការងារដឹកជញ្ជូន សម្ភារបរិក្ខារបម្រើឲ្យការបោះឆ្នោតទៅកាន់ការិយាល័យរបស់ គ.ក.ប របស់ គឃ.សប ចុងផ្លាស់ ខណៈផ្លូវឆ្លងកាត់ទៅគោលដៅទាំងនោះត្រូវឆ្លងអូរប្លាយ និងកំពុងមានភ្លៀងធ្លាក់ផងដែរ ប៉ុន្តែក្រុមការងារនៅតែប្រឹងប្រែងដឹកជញ្ជូនដើម្បីទៅដល់គោលដៅ។
យ៉ាងណាមិញ ការដឹកជញ្ជូនដោយប្រើសត្វដំរី និងក្រុមការងារជិះម៉ូតូឆ្លងកាត់អូរប្លាយនេះបានទៅដល់ទីតាំងដោយសុវត្ថិភាព៕
